Районти патшалăх техника надзорĕнче хальхи вăхăта 1850 техника шутра тăрать. Çулталăк пуçланнăранпа кăçал 160 единица (прицепсемпе, хăй тĕллĕн çỹрекен машинăсемпе пĕрле) хушăннă. Парк 8 комбайнпа, 37 тракторпа тата хăй тĕллĕн çỹрекен машинăпа пуянланнă. Иртнĕ çул "уй-хир карапĕсемпе" "хурçă утсене" пурĕ те 27 единица çеç туяннă пулнă. Паллах, техника шучĕ çакăн пек ỹснинче патшалăх пулăшăвĕн витĕмĕ пысăк. Кăçал илнĕ ял хуçалăх техникишĕн 40 процент таран субсидилеççĕ. Ку ял хуçалăх предприятийĕсемпе фермер хуçалăхĕсене питĕ хавхалантарчĕ.

Çак кунсенче "Исток" çĕр ĕç фирми, Ф. Чабатов фермер, "Весна" пĕрлешỹ комбайн, "Красное Знамя" ял хуçалăх предприятийĕ, С. Манзуркин, Л. Семенов фермерсем трактор туяннă. Район администрацийĕн пуçлăхĕн çумĕ-_ экономика, ял хуçалăх, çĕр тата пурлăх хутшăнăвĕсен пайĕн начальникĕ Виктор Львов, Патшалăх техника надзорĕн районти начальникĕ Илья Васильев хуçалăхсене çитсе килчĕç, çĕнĕ техникăпа паллашрĕç.

Тракторсемпе комбайнсем, кăкарса çỹремелли ытти агрегатсем нумай çул ĕçлеччĕр тесен тирпейлĕ тытмалла: вăхăтра юсамалла, хĕл каçарма тивĕçлĕ условисем туса памалла. Ф. Чабатов фермерăн техники ятарлă хуралтă айĕнче тăрать. 2012 çулта туяннă комбайнпа çак кунсенче илсе килнине юнашар вырнаçтарнă. 7-8 çул вырмана хутшăнни те çĕнĕ пекех курăнать.

- Хальхи комбайнсемпе ĕçлеме питĕ кăмăллă. Механизаторсене валли условисем лайăх: тусан кĕмест, кондиционер вырнаçтарнă, кĕвĕ те итлеме пулать. Хуçалăхăн çĕр лаптăкĕ пысăкланнă май тепĕр "уй-хир карапĕ" кирлехчĕ, çавăнпа туянас терĕмĕр. Малашлăхра "Кировец" трактор тата кăкармалли агрегатсем илме тĕллев лартнă, - терĕ Ферид Чабатов çĕнĕ техникăна кăтартнă май.

Сăкăтри "Красное Знамя" пĕрлешĕвĕн К-739 МСт1 маркăллă "хурçă учĕ" те паркра таçтанах курăнать. Вăл ыттисенчен чылай мăнаçлăрах. Хăватлă техника сахалтарах тăкакпа хирти ĕçсене кĕске вăхăтра пурнăçлама май парать.