Турханта çуралса ỹснĕ паллă ỹнерçĕн А. Кокелĕн çурт-музейĕ регион шайĕнчи культура еткерлĕхĕ шутланать. XIX ĕмĕрĕн вĕçĕнче тунăскер çулсем иртнĕçем юсав ыйтатчĕ. 2018 çулта кунта пуçарулăх бюджечĕн программипе усă курса пỹрт территорине хăтлăх кĕртессипе ĕçлеме пуçăнчĕç. Пурĕ 1,9 млн тенкĕ укçа тăкакланă. Пĕлтĕр вара музее реставрацилеме проектпа смета документацине хатĕрлесе çитернĕ. Халĕ шăпах НПП "Наследие" пĕрлешỹ (директорĕ -. Миронов) ăна çĕнетессипе - 4 млн тенкĕлĕх- тăрăшать. Çак кунсенче вĕсен ĕç-хĕлĕпе район администрацийĕн пуçлăхĕ Р. Селиванов паллашнă. Рудольф Васильевич объектăн пĕлтерĕшĕ халăхшăн пысăк вырăн йышăннине, строительсене шаннă тивĕçе пахалăхлă пурнăçлама, графика пăхăнма каланă.

Реставраци хыççăн çурт-музей районта пурăнакансемшĕн кăна мар, республикăран тата ытти çĕртен килекенсемшĕн те илĕртỹллĕ вырăнсенчен пĕри пулмалла. Кунта А. Кокелĕн пултарулăхĕпе тата Раççейре, Белоруссинче, Украинăра палăрнă ỹнерçĕсен тата сăрă тĕнчинче пĕрремĕш утăм тăвакансен картинисемпе те паллашĕç.

О. БЕЛЬДЕКОВА

Авангард