ÇУРЛА уйăхĕ юбилейсемпе пуян пулчĕ. Юхмапа Пăла тăрăхĕнче пурăнакан вунă ватă хăйсен пысăк юбилейне паллă турĕç. Вăл шутран иккĕшĕ - Чăваш Ишекĕнчи М. Шихрановапа Шăнкăртамри М. Абейдуллова - 95 çул тултарчĕç. Вĕсене пурне те Раççей Президенчĕн Владимир Путинăн саламĕпе пĕрлех район администрацийĕн пуçлăхĕн Рудольф Селивановăн ăшă сăмахĕсене те çитернĕ.

Çакна та палăртса хăвармалла. Вăрăм ĕмĕрлисенчен ытларах пайĕ - хĕрарăмсем. Вĕсем вăтамран 80 çул (пĕлтĕр те кăтарту çаплах пулнă) пурăнаççĕ. Арçынсен ĕмĕрĕ вара чылай кĕске - 66 çул. Районта паянхи куна тăххăрмĕш теçеткене хыçа хăварнă 231 çын пурăнать. Тутар Сăкăтĕнчи Решиля Азизовапа Чăваш Ишекĕнчи Дария Калиникова вара 104 çулта! Чăтăмлă та тỹсĕмлĕ ĕç ветеранĕсем ыттисемшĕн ырă тĕслĕх.