Хисеплĕ вăрçă ветеранĕсене, участникĕсене, тыл хастарĕсемпе салтак арăмĕсене юбилей ячĕпе Раççей Президенчĕн ятран çырнă открыткипе район администрацийĕн пуçлăхĕн Рудольф Селивановăн салам сăмахĕсемпе парнине сумлă лару-тăрура парас йăлана чăннипех те ырламалла.

Эрне пуçламăшĕнче çеç çакнашкал чыса Юхмапа Пăла тăрăхĕнчен харăсах икĕ ветеран - Анат Чакăри Вера Григорьевна Шурбина (90 çул) тата Люляри Ия Сергеевна Дубинина (95 çул) тивĕçнĕ. Вĕсем иккĕшĕ те тыл паттăрĕсем, салтак арăмĕсем. Урăхла каласан, çĕршывшăн йывăр вăхăтсенче ырми-канми ĕçленĕ хастарсем.

Тĕл пулура ĕç ветеранĕсем хăйсем утса тухнă çăмăл мар вăхăтсене аса илнипе пĕрлех ватăсене çакăн пек тимлĕх уйăрни пысăк пĕлтерĕшлĕ пулнине палăртнă, хисепшĕн чун-чĕререн тав тунă.