ЮХМАПА Пăла тăрăхĕшĕн иртсе пыракан çул чылай çитĕнỹпе тата çĕнтерỹпе асра юлĕ. Иртнĕ эрнере çеç Патăрьелĕнчи пĕрремĕш вăтам шкулти учительсен хор коллективĕ республикăра Культура çулталăкне халалланă конкурса ăнăçлă хутшăнса лауреат ятне çĕнсе илнĕ. Чăваш Республикин культура тава тивĕçлĕ ĕçченĕ Петр Никитин ертсе пыракан пысăк ушкăн (60 çынтан кая мар) сцена çине тухсанах куракансем ял артисчĕсене тăвăллăн алă çупса кĕтсе илнĕ. Çакă вара "аванс" шучĕпе çеç пулман, кашни юрра вĕсем 3-4 сасăпа, пĕр тикĕс шăрантарнă. Пĕрлештернĕ ушкăнта ачасемпе культура работникĕсем те пур.