ЮЛАШКИ вăхăтра пĕтĕм çĕр-шывĕпех çулсем çинче ачасемпе çыхăннă инкексем тăтăш тĕл пулнине шута илсе Чăваш Республикин шалти ĕçсен пайĕн çул çинчи хăрушсăрлăхĕн патшалăх инспекцийĕ тата Вĕрентỹ министерстви сентябрĕн 15-мĕшĕнчен пуçласа октябрĕн 15-мĕшĕччен обществăлла йĕркелĕхе сыхлас, хăрушсăрлăх йĕркине ачасене вĕрентес тĕллевпе уйăхлăх йĕркеленĕ. Çак хушăра шкулсенче ачасене çул çинче тимлĕ пулмаллине, çул-йĕр хăрушсăрлăхĕн правилисене çирĕп пăхăнмаллине вĕрентсе тĕрлĕ мероприяти иртĕ, ГИБДД ĕçченĕсемпе тĕл пулусем йĕркелĕç. Патăрьелĕнчи ача-пăча вулавăшĕнче тĕрлĕ тĕслĕ хутран, пластилинран ăсталанă çул-йĕр паллисен куравĕ уçăлнă та ĕнтĕ.

Çавăн пекех сентябрĕн 26-27-мĕшсенче районта "Ỹсĕр водитель" операци иртет. ГИБДД ĕçченĕсем кашни иккĕмĕш машинăна чарса тĕрĕслĕç. Çавăнпа та çула тухакан водительсен те, çуран çỹрекенсен те пĕтĕмĕшле йĕркене çирĕп пăхăнмалла.