РАЙОНТИ тĕп больницăра йĕркеленĕ донор кунĕ пысăк яваплăхпа иртнĕ. Кун каçа 172 çын ыркăмăллăх акцине хутшăннă. Пуçаруллисенчен районти пенси фончĕн, професси училищин коллективĕсене, Ыхра Çырми, Нăрваш Шăхаль, Хирти Пикшик ял тăрăхĕн уйрăм хастарĕсене палăртмалла.

Сывлăхлă та тĕреклĕ çын юн пани – инкеке лекнисене алă тăсниех. Анчах ун пек чухне çак йĕркесене çирĕп пăхăнмалла: выçă хырăмпа е çуллă апат çинĕ хыççăн, икĕ талăк маларах эрех е эмел ĕçсен теветкеленсе венăна шăтарттармалла мар. Имшерккесен те (50 килограмран кая пулсан) сăваплă ĕçрен тытăнса тăмалла.