Декабрĕн 13-мĕшĕнче райадминистрацин аслă залĕнче район депутачĕсен Пухăвĕн черетлĕ ларăвĕ пулса иртнĕ. Унта депутатсемсĕр пуçне ял тăрăх пуçлăхĕсем тата администрацин структура подразделенийĕсен ертÿçисем хутшăннă. Ларăва район пуçлăхĕ – район депутачĕсен Пухăвĕн председателĕ Михаил Петров ертсе пынă.

Халăх “тарçисем” Патăрьел район депутачĕсен Пухăвне 22-мĕш пĕр мандатлă Сăкăт суйлав округĕ тăрăх суйланнă Петр Никифоров депутат хăйĕн полномочийĕсене урăххине пама тивнĕ пирки ыйту пăхса тухнă, асăннă суйлав округĕнче хушма суйлав ирттерме палăртнă. Петр Николаевич Никифорова Чăваш Республикин Патшалăх Канашне депутата суйланă май тата вăл 22-мĕш пĕр мандатлă Сăкăт суйлав округĕнчен районти депутатсен Пухăвне суйланă депутатăн полномочийĕсене урăххине пама ыйтса çырнине тивĕçтернĕ – ăна вăл йышăнакан должноçран – район депутачĕсен Пухăвĕн председателĕн заместителĕнчен хăтарнă. Ун вырăнне район депутачĕсен Пухăвĕн депутачĕсен полномочийĕсем вĕçлениччен райпо совечĕн председательне Петр Алексеевич Перепелкина суйланă.

Депутатсем çавăн пекех муниципалитетăн хăш-пĕр пурлăхне тÿлевсĕрех Сăкăт ял тăрăхне куçарасси пирки конкретлă решенисем йышăннă, ытти ыйтусене пăхса тухнă.