Иртнĕ кĕçнерникун ирхине тăватă сехетре Нăрваш Шăхалĕнче чылайăшĕ тутлă ыйхăра пулнă. Шурăмпуç шуралса киличченех çак ялти К. Сергеева хуçалăхĕнче сасартăк вут-çулăм алхасма пикеннĕ. Пушарта йывăç çурт тата хуралтă тăррисем çунса сиенленнĕ. Сăлтавĕ, чылай чухнехи пекех, электрооборудованипе усă курнă чухне асăрханусăр пулни. Юрать-ха тата кил хуçи çурт-йĕрне инкек-синкек, вут-кăвартан страхланă.

Çулталăк пуçланнăранпа Нăрваш Шăхалĕнче пушарниксен иккĕмĕш хут вутпа куçа-куçăн тăма тивнĕ. Пĕлтĕр çак тапхăрта вара вĕсен пĕр пушар та пулман. Çавăнпа ку енĕпе асăрханулăха, тимлĕхе пурин те ÿстермелле.