Водительсем канашланă
Иртнĕ эрнере район администрацийĕн пуçлăхĕ Н.Глухов ертсе пынипе районти водительсен пухăвĕ пулнă. Унта çул-йĕр хăрушсăрлăхĕпе ĕçлекен районти комисси председателĕ И.Дикин тата комисси членĕсем, Чăваш Республикинчи УГАДН патшалăх инспекторĕ О.Андрианов, районсем хушшинчи 2-мĕш налук инспекцийĕн ертÿçин çумĕ Г.Филиппов, ял поселенийĕсен пуçлă-хĕсем, предприятисемпе организацисен инженерипе техника ĕçченĕсем, шкул автобусĕсемшĕн яваплă çынсем хутшăннă.
Районти шалти ĕçсен пайĕн çул çÿрев хăрушсăрлăхĕн патшалăх инспекцийĕн начальникĕн тивĕçĕсене пурнăçлакан А.Кошкин пĕлтĕр пулнă çул-йĕр инкекĕсем, вĕсен сăлтавĕсем пирки тĕплĕн каласа панă. Кăçал çул-йĕр правилисене пăсакансене хирĕç тивĕçлĕ мерăсем йышăнма палăртнине пĕлтернĕ.
Пухăва хутшăнакансем çул-йĕр правилине, автотранспортсене регистрацилемелли правилăна, транспорт хатĕрĕсен паспорчĕсен тата транспортсен шасси паспорчĕсен Положенине кĕртнĕ çĕнĕлĕхсемпе улшăнусене пĕлнĕ.
Чи лайăх кăтартусем тунă тата аварисĕр ĕçленĕ водительсене Хисеп грамотисемпе тата парнесемпе хавхалантарнă.