Чăваш Республикинче пĕлтĕрхи чÿк уйăхĕн 26-мĕшĕнче çамрăк талантсене пулăшас, сусăр ачасемпе тăлăхсене тата ашшĕ-амăшĕн хÿттисĕр юлнисем валли укçа-тенкĕ пухас тĕллевпе «Ачалăхшăн, ачалăх ячĕпе» ыркăмăллăх марафонĕ старт илчĕ. Сăваплă ĕç чăвашсен ырă йăлипе – ниме мелĕпе иртет.

Чылай организаци-предприяти, уйрăм çынсем пулăшу пама ĕлкĕрнĕ. Вăл шутра – Юхмапа Пăла тăрăхĕнчисем те. Эпир те «Авангард» хаçат ĕçченĕсем, марафон пухмачне укçа куçарса патăмăр. Патăрьелсем ку енĕпе нихçан та кайрисем пулман. Чăнах та çак тĕпренчĕксене пурин те май çитнĕ таран пулăшасчĕ. Сăваплă ĕçрен пĕри те пăрăнар мар.