Делегацие район пуçлăхĕ Н. Глухов йышăннă. Калаçура Чăваш Республикин Президенчĕн çĕнĕ урамсене (ялсене) васкавлă электрификацилесси çинчен калакан 2009 çулхи декабрĕн 30-мĕшĕнчи Указне пурнăçлас тĕллевпе районти çĕнĕ урамсене электричество кĕртес пирки сăмах пынă.

2010 çулта çĕнĕ урамсене электрификацилемелли программăна Патăрьел районĕн 18 объектне кĕртнĕ. Çавна май 0, 4 киловольтлă электролини 15, 91 километр, 10 киловольтлă электролини 3 километр кармалла, 1639 киловатт хăватлă 15 трансформатор подстанцийĕ лартмалла. Пĕтĕм ĕç калăпăшĕ 33865 пин тенкĕлĕх пулмалла.

Пĕрремĕш тапхăрта, 2010 çулхи июнĕн 1-мĕшĕччен, килĕшсе татăлнă проектпа смета документациллĕ объектсенче ĕçе вĕçлемелле. Ун пек объект-сем пиллĕк. Ытти ял поселенийĕсен пуçлăхĕсен 2010 çулхи апрелĕн 1-мĕшĕччен проект хатĕрлемелле, вĕсем пирки тивĕçлĕ органсенче килĕшсе татăлмалла тата вĕсене «Чăвашэнергона» тăратмалла.

Тĕл пулура Патăрьелĕнчи электролинисене тата урама çутатмалли системăна çĕнетес пирки те калаçнă.