Ырă пуçарăва хапăл тунă
Çак шухăшсене тĕпе хурсах ĕнтĕ Тури Чакăсем граждансен пухăвĕнче ял халăхĕн вăйĕпе, хастарлăхĕпе Аслă вăрçăра пуç хунисене хисеп туса палăк-часовня лартма шут тытнă. Ырă пуçарăва пурте тенĕ пекех хапăл туса йышăннă. Ара, вăрçă варкăшĕ кашни килех кĕрсе тухнă-çке. Чылай çемьешĕн вăл пирчейми суран пулса юлнă. Пысăках мар Тури Чакă ялĕнчен 77 салтак вăрçă хирĕнчен таврăнайман. Хăш-пĕр çемьерен 2-3 салтак та хыпарсăр çухалнă.
– Пуху хыççăнах ырă пуçарăва хапăл тунă ял халăхĕ проектпа килĕшÿллĕн пулас палăк вырăнне йывăçсенчен тасатма, тирпейлеме, никĕс валли çĕр ха-тĕрлеме кар тухрĕ. Пуçламăш ĕçсене пурнăçлама 58 çын хутшăнчĕ. Халĕ палăк никĕсĕ хатĕр, утма çула та тирпейлесе пĕтернĕ. Сивĕ вăхăтĕнче ĕçсем чарăнчĕç-ха. Çапах та Çĕнтерÿ 65 çул тултарнă тĕле палăк-часовньăна хута ярас тесен, уйрăм çынсенчен те, вырăнти администрацинчен те пулăшу кирлĕ. Палăк çине 77 паттăрăн ятне ылтăн шывпа çырса вырнаçтарасшăн. Тури Чакăри пĕр паттăр салтакăн ячĕ те ан манăçтăр, – каласа парать çак пархатарлă ĕçе пуçарса яракан хастарсенчен пĕри И. Никифоров ĕç ветеранĕ.
Ырă ĕçĕн яланах хакĕ пысăк. Шанас килет: Тури Чакăсем хăйсен тĕллевне пурнăçлĕç.
А. ЕГОРОВА