Çут çанталăкăн кашни вăхăчĕ хăйне евĕр хитре. Пире, хăнăхнăскерсене, шартлама хĕл кунĕсем те чуна çывăх. Юлашки çулсенче вăл хĕр кăмăлĕ пек вылянчăклă тăрать: е ăшăтса пăрахать, е сивĕтет... Çил-тăман тустарса çул-йĕре хÿсе лартма, çурт тăррисене тултарса хума та пултарать. Хăйĕн ирĕкĕ-çке, ку таранччен çĕр çинче этем çут çанталăкран вăйлăрах пулман-ха. Çавăнпа та хĕл кунĕ хăйĕн илемĕпе çеç савăнтартăр, никама та хамăрăн тимсĕрлĕхпе инкек ан кÿтĕр тесен яваплă организацисен çулсене вăхăтра тасатса тăмалла, çурт-йĕр çинче пуçтарăннă хулăн юр ишĕлсе анса сăтăр ан тутăр тесе пăхсах тăмалла.