Паян мана, чылай хура-шур курнă çынна, акă мĕн пăшăрхантарать. Республика тĕп хулинче, Шупашкарта, урам ячĕсене те, автобус-троллейбус чарăнмалли вырăнсене те икĕ чĕлхепе: вырăсла тата чăвашла çырнă. Сăмахран, “Проспект тракторостроителей – трактор тăвакансен проспекчĕ”. Сăмах çаврăнăшне кĕскетсе те çырман. Пирĕн вара урăхла. Акă Çĕнĕ Ахпÿрте кĕнĕ çĕре “Нов. Ахпердино” тенĕ. Ÿнерçĕ икĕ саспаллине çырма вырăн тупайман, меслетлеймен. Пирĕн яла кĕнĕ çĕре те икĕ чĕлхепе “Вăтаел – Новое Бахтиярово” темелле, ун çумĕпе шăнкăртатакан юханшыва “река Була – Пăла юханшывĕ” тесе икĕ чĕлхепе çырмалла. Ку вăл чăн малтан хамăр чĕлхене хисеплени. Эпир çапла тумасан пирĕн чĕлхе культуришĕн никам та ют çын тăрăшас çук.

Халĕ чăнах та ялпа ял хушшинче асфальтлă çул. Машинăсем питĕ пысăк хăвăртлăхпа çÿреççĕ. Çавăнпа та кунта мĕнле хăвăртлăхпа çÿремеллине кăтартакан паллăсем те кирлех. Çак ĕçсене вырăнти администрацин йĕркелемеллех.

Н. МАШИН. Вăтаел.