2008 çулхи ноябрĕн 1-мĕшĕнче ГИБДД управленийĕн çул-йĕр патруль полкĕн темиçе экипажĕ Шупашкартан Патăрьелне килнĕ. Вырăнта маршрутсем тăрăх çула тухнă.

Çурçĕр çитеспе патруль машини Шăнкăртам урамĕпе пынă. Пĕр вырăнта ăна дискотекăран таврăнакан çамрăксен ушкăнĕ, 20 çынна яхăн, тĕл пулать. Çул çине тăрса машинăна малалла кайма кансĕрлет. Милиционерсем хăйсене ирттерсе яма ыйтнă, хирĕç усал сăмахсем илтнĕ. Хаяр шухăшлă ушкăн милици машинине çавăрса илнĕ, милиционерсене “чĕнмен хăнасем” тесе кăшкăрнă. Урисемпе тапса, ал айне лекнĕ чул катăкĕсемпе çапса машинăна сиенленĕ. Наряд раципе тепĕр экипажа чĕнсе илнĕ. “Хĕрнĕ пуçсем” ку машинăна та сиенленĕ. Милиционерсене чăмăркка та тутантарнă. Лару-тăру тата та йывăрланасса сиссе икĕ машина та кунтан кайнă. Çын вилни ан пултăр тесе милиционерсем хĕç-пăшалпа усă курман. Çамрăксен хулиганла ĕçне пула икĕ милиционер суранланнă.

Асăннă факт тăрăх районсем хушшинчи следстви пайĕ РФ Уголовнăй Кодексĕн 318 статйипе килĕшÿллĕн уголовлă ĕç пуçарнă. Вăл власть представителĕсене тапăнни çинчен.