Вĕренекенсем районти ГИБДД пайĕн пропаганда инспекторĕпе Т.Борисовăпа тĕл пулнă. Класс ертÿçисем тематикăлла класс сехечĕсем ирттернĕ. Эрнен юлашки кунĕнче çиччĕмĕш-саккăрмĕш классенче вĕренекенсем “Эсĕ урама тухрăн” темăпа заняти йĕркеленĕ.

Кружоксене кăмăллаççĕ

Хирти Пикшикри вăтам шкулта вĕренекенсем кружоксем ĕçе пуçăнасса чăтăмсăррăн кĕтеççĕ. Кашнийĕшĕ хăйне килĕшекеннине çÿреме пултарать.

– Эпĕ “Знайка” кружока суйласа илтĕм. Математикăпа кăткăс задачăсем ытларах шутласшăн, – калаçать çиччĕмĕш класра вĕренекен И.Каштанова.

Пуçласа Хирти Пикшике килекен Еншик ачисем тĕрлĕ кружока çырăнчĕç. Пĕлĕвĕсене хушма занятисенче тарăнлатасшăн вĕсем. М.Матвеев “Çамрăк информатик” кружока кăмăллать.

Символсене пĕлеççĕ

Раççей символĕсене пĕлессишĕн тупăшсах ăмăртрĕç регионсем хушшинчи конкурсăн шкулсенче йĕркеленĕ пĕрремĕш этапĕнче Хирти Пикшикре вĕренекенсем. Вĕсем виçĕ номинацине те хутшăнчĕç. Района 6 ĕç тăратрĕç. Тăххăрмĕш класра вĕренекенсем хушма литературăпа усă курса сочиненисем çырчĕç.