Пушар ан кăтарттăр типшар
Инкек куçа курăнса килмест. Кăçалхи ултă уйăхра районта 22 пушар пулчĕ, 2153738 тенкĕлĕх тăкак кÿчĕ. Пушарсем ытларах уйрăм хуçалăхсенче тухнă. Пурĕ 16 пулнă, 5 çурт тĕпĕ-йĕрĕпех кĕлленнĕ, 11-шĕ сиенленнĕ, 5 çын пурнăçĕ татăлнă. Электрооборудованисемпе усă курнă чухне вут-кăвартан сыхланмалли йĕркене пăхăнманран, юсавсăр кăмакасемпе усă курнăран 6 пушар пулнă. Патăрьел ял тăрăхĕнче 4-пушар, Турханпа Сăкăтра 3-шер тухнă. Тутар Сăкăт, Шăнкăртам, Ишлĕ ял тăрăхĕсенче вут-çулăм икшер хут алхаснă. Пурлăха вут-кăвартан сыхласси яланах пысăк пĕлтерĕшлĕ. Вут-çулăм ан тухтăр тесе районти пушар хуралĕн ĕçченĕсем профилактика ĕçĕсем ирттереççĕ пулин те инкексем пулсах тăраççĕ. Майăн 21-мĕшĕнчен пуçласа июлĕн 25-мĕшĕччен “Пурăнмалли çурт-йĕр–2008” операцин пĕрремĕш тапхăрне ирттерчĕç. Çак вăхăтра çурт-йĕре тĕрĕслерĕç. Операцие ял тăрăхĕсенчи администраци ĕçченĕсене, участоксенчи милици инспекторĕсене, ВДПО специалисчĕсене явăçтарчĕç. Ытларах пĕччен пурăнакан ватăсем, нумай ачаллă, ĕçкĕ-çикĕпе иртĕнме юратакан çемьесем пурăнакан çуртсене çитсе курма тăрăшрĕç. Пĕтĕмлетсен çакă палăрчĕ: çуртсенче кивелнĕ электропроводасемпе усă кураççĕ, кăмакасене вăхăтран-вăхăта юсамаллине, ÿсĕрпе пирус туртни те пысăк инкек патне илсе пынине манаççĕ.
Пушар ниме те тиркесе тăманнине, çут çанталăкăн хăш тапхăрĕнче те пысăк инкек пулма пултарнине манас марччĕ.