Тĕл пулу хыççăн тĕл пулу, вăйă хыççăн вăйă... Ветерансем те, çамрăксем те парăнасшăн мар. Анчах турнир чи вăйлă спортсменсене мар, чи вăйлă командăсене палăртаканни. Çапла вара тĕп шкулсен хушшинче 1-мĕш вырăна Кзыл Чишма шкулĕн команди, 2-мĕшне – шкул-интернатăн, 3-мĕшне Именкасси шкулĕн командисем йышăнчĕç.

Волейболистсен финалти вăййисем çивĕч те тыткăна илмелле иртрĕç. Учительсен коллективĕсенче район шайĕнче выляма пултаракансем йышлă пулни савăнтарчĕ те, тĕлĕнтерчĕ те.

Арçын-волейболистсем хушшинче Патăрьелĕнчи 1-мĕш вăтам шкулпа Нăрваш Шăхаль шкулĕн командисем çивĕч тупăшрĕç. Нăрваш Шăхальсем темле тăрăшрĕç пулсан та Патăрьелсене парăнчĕç. Патăрьелсен командинчи В.Гранатскин, В.Падисовпа М.Алимовăн çĕнтерÿри тÿпи пысăк тесех палăртрĕç куракансем.

Спартакиада итогĕсемпе 1-мĕш вырăна Патăрьелĕнчи 1-мĕш вăтам шкул, 2-мĕшне – Нăрваш Шăхаль вăтам шкулĕ, 3-мĕшне – Патăрьелĕнчи 2-мĕш вăтам шкулсем йышăнчĕç.