Вăрçăран килеймен çамрăксем

Тăван ял варринче – шурă палăк,

Йĕркипе ешереç хурăнсем,

Вăрман мар мĕн кунта – паттăр халăх,

Вăрçăран килеймен çамрăксем.

Кĕрхи çумăр сире йĕпетмест-ши;

Çумăр мар мĕн, йĕреç аннесем.

Миçе ир, миçе каç шав кĕтмен-ши;

Таврăнмарăр киле, ывăлсем.

Сарă çулçă çĕре тăкăнать-ши;

Çулçă мар мĕн... Вĕсем – çырусем.

Çыру урлă пире мĕн калаç-ши

Вăрçăран килеймен салтаксем;

...Тăван ял варринче – шурă палăк,

Йĕркипе ешереç хурăнсем.

Çук, манмастпăр сире, паттăр халăх, –

Вăрçăран килеймен арçынсем.