Саккун суд приставĕсен ыйтăва татса памалли правине пысăклатать. Саккун парăмçă суд йышăнăвне пурнăçламасăр вăхăтлăха Раççей Федерацийĕнчен тухса каймалла марри çинчен тепĕр хут çирĕплетет. Ытти пурнăçа кĕртмелли документсене пурнăçламасан суда памалла. Суд приставĕ пурнăçламалли ĕçпе çыхăннă финанс хучĕсене, укçине тĕрĕс тытса е куçарса пынине, пурнăçламалли ĕçе тĕрĕс туса пынине тĕрĕслеме пултарать. Çавăн пекех парăмçăн харпăрлăхри пурлăхне патшалăх регистраци органĕ урлă тĕрĕслеме, çавăн пекех хăйсĕрех килне кĕме те пултарать.

Çĕнĕ саккунта уçă аукцион мелĕпе ирттермелли пурлăхсен тĕсĕсене те асăннă. Кунта 500 пин тен-кĕрен иртнĕ куçман тата хывнă пурлăх, хаклă хутсемпе пурлăх кĕреççĕ. Суд приставĕсем 30 пинрен иртмен пурлăха хăйсем хаклама пултараççĕ.

Çĕнĕ положени те вăя кĕнĕ. Пурнăçлама ыйтнă хутсене тÿрех банк урлă, 25 пин тенкĕ таран шыраса илмеллисене вара çын ĕçлекен, пенси е стипенди илекен вырăнтан тытаççĕ.

Преступлени тунăшăн айăпласа штраф шыраса илессинче те çĕнĕлĕх пур. Приговор вăя кĕнĕ хыççăн 60 кунта штрафне тÿлемесен вăл унтан пăрăнни шутланать, çавăнпа та ăна урăх тĕрлĕ айăплавпа улăштараççĕ.

Граждансен çăхавĕсене пăхса тухнă çĕрте те улшăну пур. Ăна пăхса тухакан должноçри кашни çыннăн яваплăхĕ ÿснĕ. Саккунпа килĕшÿллĕн суд приставĕсен ĕçĕпе килĕшмесĕр аслă суд приставне жалоба пама пултараççĕ. Жалобăна кĕнĕ хыççăн вунă кунтан пăхса тухмалла.

Административлă право йĕрки çинчен калакан Кодексра çĕнĕ статьясем хушăннă. Суд приставĕ саккунлă ыйтнисене пурнăçламасан, ĕçрен хăтарни, çĕнĕ ĕçе куçни, ăçта пурăнни çинчен пĕлтермесен, айăпланаканăн пурлăхĕ пирки суя информаци парсан, пурнăçа кĕртмелли документа çухатсан, ăна вăхăтра ямасан граждансене 2, 5 пин, должноçри çынсене 20 пин таран, юридика пĕлтерĕшлисене 100 пин тенкĕ штраф параççĕ.

Çĕнĕ саккунра маларахрипе танлаштарсан тата 35 статья ытларах хутшăннă.