Пухăннисем 2007 çулта республикăри ялсене хытарса тунă çулпа çыхăнтарас енĕпе мĕнле ĕçленине тишкернĕ, кăçалхи çул-йĕр строительствин сезонне хатĕрленсе ирттерес тĕлĕшпе пурнăçламалли çĕнĕ тĕллевсене палăртнă. Пĕлтĕрхи ĕç кăтартăвĕсемпе пухăннисене министр çумĕ Александр Лепилин паллаштарнă. Вăл палăртнă тăрăх, ĕç çăмăлах пулман, «çĕнĕ программăна таса хутран» тытăнма тивнĕ. Çул-йĕр строительствин кун пек калăпăшĕ тата хăвăртлăхĕ республика историйĕнче халиччен пулман.

Паян эпир çирĕппĕнех çапла калама пултаратпăр: Чăваш Республикин ялĕсене хытарса тунă çулпа çыхăнтармалли Программа 2008 çулхи авăн уйăхĕнче пурнăçланать.

Канашлăва хутшăннисем пĕр-пĕрин опычĕпе паллашнă, хăйсен малашнехи тĕллевĕсем çинчен каласа панă. Калаçăва Канаш, Тăвай, Шăмăршă, Елчĕк, Комсомольски, Патăрьел районĕсен представителĕсем хутшăннă.

Ыйтусене Александр Гончаров министр хуравланă. Вăл программăна пурнăçлас ĕçре вырăнти тивĕçлĕ органсене республика шайĕнче пулăшма шантарнă.