Пахалăхсăр алкоголь сутрăн–явап тыт
Граждансем начар пахалăхлă алкоголь шĕвекĕсем ĕçессине асăрхаттарас тĕллевпе право йĕркине сыхлакан органсем тĕрлĕ мероприяти ирттереççĕ. Вĕсенчен пĕри начар пахалăхлă эрех-сăра сутакансене тупса палăртасси тата административлă е уголовлă явап тыттарасси пулса тăрать. Юлашки вăхăтра Чăваш Республикинче услам илес тĕллевпе килте хатĕрленĕ спирт шĕвекĕсем сутакансем пирки суд практики çирĕпленчĕ. Тĕслĕхрен, районсем хушшинчи следстви пайĕн следователĕсем хальхи вăхăтра Елчĕкпе Патăрьел районĕнче пурăнакансем пирки икĕ уголовлă ĕç тишкереççĕ. Вĕсем граждансене пурнăçшăн хăрушă спиртлă шĕвек сутса пурăннă. Спирт шĕвекĕсем сутнăшăн вĕсене унччен штрафланă та пулнă, анчах та вĕсем çакăнтан тивĕçлĕ пĕтĕмлетÿ туман. Çывăх вăхăтра ĕçсене суда ярса параççĕ. Уголовлă саккуна пăсакансене икĕ çул таранах ирĕкрен хăтармалли айăплав кĕтет.