Ыхра Çырминчи почта уйрăмĕ икĕ хутлă кирпĕч çуртра вырнаçнă. Ирпе ирех ĕç шавĕпе тулать пỹлĕм. Пĕрисем электроэнергипе, газпа усă курнăшăн укçа тỹлеççĕ, теприсем 2008 çулхи пĕрремĕш çур çулшăн хаçат-журнал çырăнаççĕ. Открытка, конверт туянакансем те, посылка яракансем те пур. Почта уйрăмĕн начальникĕ Людмила Аркадьевна Шихранова кашнинех ăшшăн кĕтсе илет, кăмăллă калаçать.

Уйрăма 811 экземпляр хаçат-журнал килсе тăрать. Вĕсенчен 157-шĕ район хаçачĕ. "Авангарда" чи нумай çырăнтараканĕ _ Наиле Сайдашева почтальонка. Ыхра Çырминче 78 экземпляр салатать вăл ăна. Треньелĕнчи Марина Положина район хаçатне _ 44, Чăваш Ишекĕнчи Елена Викторова 35 киле çитерет. Почтальонкăсем халăха ытти çăмăллăхсемпе те тивĕçтереççĕ. Пин ытла çынна пенси-пособи валеçеççĕ, хăйсен ĕçне юратса пурнăçлаççĕ. Хальхи çырăнтару тапхăрĕнче те хастарлăха чакармарĕç вĕсем, кашни çынпа курса калаçма тăрăшрĕç.

Хаçат-журнала кăмăллакансем кашни ялтах пур. Чăваш Ишекĕнчи С.Кулакова, Г.Никишкин, М.Харитонов, Н.Шихранов, Ыхра Çырминчи М.Бурчаклы, Ф.Хамидуллов, Р.Тазетдинов, Р.Тимурбулатов, Ш.Тазетдинов, Треньелĕнчи Л.Захарова, И.Михайлов çемйисем 4-5-шер экземпляр хаçат-журнал çырăнаççĕ. Вĕсемех "Авангардпа" та туслă. Асăннă ялсенче пурăнакансем Çĕнĕ çула та юратнă хаçатпа кĕтсе илĕç. Ăна илсе тăма 160 çемье кăмăл тунă.