Юлашки кунсенче çанталăк сивĕтсе кайрĕ пулин те районта хутмалли тапхăр ăнăçлă пырать. Резерв топливине кÿрсех тăраççĕ. Çапах та çакнашкал сивĕсенче электроприборсемпе, газ хуранĕсемпе питĕ асăрхануллă пулмалла.

Планеркăра райшалĕçпайĕн эрнери ĕçне те пĕтĕмлетнĕ. Çак тапхăрта çичĕ преступление шута илнĕ, 85 административлă протокол çырнă.

Районти кашни ял тăрăхĕнчех Çĕр-шыв хÿтĕлевçин кунĕ ячĕпе тĕрлĕрен мероприяти йĕркеленĕ. Вĕсем пурте кăмăллă иртнĕ.

Ял хуçалăх кооперативĕсенче халĕ хĕрÿ тапхăр – отчетпа суйлав пухăвĕсем пыраççĕ. Вĕсем март уйăхĕнче вĕçленмелле.

Вĕрентÿ системинче çывăх вăхăтра пĕрремĕш класа каякан ачасен ашшĕ-амăшĕн клубне туса хурасшăн. Район пуçлăхĕ Н.Глухов çакнашкал ырă пуçарăва вун пĕрмĕш класра вĕренекен ачасен ашшĕ-амăшĕпе те йĕркелеме сĕннĕ. Çакă ППЭне, экзаменсене хатĕрленес ĕçре те пысăк пулăшу пулĕ.

Планеркăра ялсенче автомобиль çулĕсем тăвассипе малалла тимлес, халăха пахалăхлă шывпа тивĕçтерес, райбольницăн хушма çуртне, спорт комплексне тăвас тата ытти ыйтусене те сÿтсе явнă.