Ленин ячĕллĕ çĕр ĕç фирминче ака-сухана, вырмана чăн-чăнах çỹллĕ шайра йĕркелесси йăлара ĕнтĕ. Хуçа каланă сăмах вĕсемшĕн яланах çирĕп саккун вырăнĕнче пулнă. Хуçалăхри çитĕнỹ çăлкуçĕн вăрттăнлăхĕ те çакăнтах-тăр. Виçĕмкун, акă, ял халăхĕ алăпа урпа вырма тухнă. Техника кĕреймен, шурлăхлăрах çĕрте çитĕннĕ культурăна ураран ỹкерме 130-140 çын хутшăннă. Вĕсем хушшинче ферма ĕçченĕсем те, строительсем те, пенсионерсем тата ыттисем те пур. Пĕр кунта ял халăхĕ кар тăнипе 17 гектар урпана çулса тирпейленĕ.

Первоисточник: "Авангард" (газета Батыревского района)